Ἀκολουθία Ὁσίου ΔΑΝΙΗΛ τοῦ Μετεωρίτου.

Ἀκολουθία Ὁσίου ΔΑΝΙΗΛ τοῦ Μετεωρίτου.

Ψαλλομένη τῇ 16^η Αὐγούστου

Ποίημα Γεωργίου Μηλίτση, Διδασκάλου (1995)

ΜΙΚΡΟΣ ΕΣΠΕΡΙΝΟΣ

Μετὰ τὸν Προοιμιακόν ἱστῶμεν στίχους δ΄ καί ψάλλομεν Στιχηρά Προσόμοια.

Ἦχος α΄. Τῶν οὐρανίων ταγμάτων.

Τρίκκη ἀγάλλου καὶ σκίρτα σήμερον ἅπασα, καὶ Τσιοτίου κώμη, καὶ Μονὴ Μετεώρου· ἀνέτειλεν ἡ μνήμη τοῦ Δανιὴλ, τοῦ τῆς Ἑλλάδος σεμνώματος· τούτου ὁ βίος προτρέπει πάντας ἡμᾶς, εἰς μετάνοιαν σωτήριον.

Τῆς Θεσσαλίας τὸ τέκνον πάντες τιμήσωμεν, τὸ τῶν Ὁσίων κλέος καὶ Πατέρων τὴν δόξαν, καὶ πάντων Ὀρθοδόξων τὴν χαρμονήν, Δανιὴλ τὸν θεσπέσιον· οὗτος παρέχει ἰάσεις παντοδαπάς, ἐνεργεία θείου Πνεύματος.

Νίκας χορήγει ἀπαύστως, τοῖς σοῖς προστρέχουσι, κατὰ δαιμόνων μάκαρ, καὶ ἐχθρῶν ὀλεθρίων, καὶ δίδου πᾶσι Ὅσιε Δανιήλ, ὑγιείαν καὶ δύναμιν, τοῖς δὲ ποθούσι παράσχου τάχος σοφέ, τὴν σωτήριον μετάνοιαν.

Σὺν τοῖς Ἀγγέλοις ἀγάλλοι Πάτερ τὸ πνεῦμά σου, παρὰ τοῦ θρόνου μάκαρ, τοῦ Κυρίου τῆς δόξης· διό σοι καταφεύγομεν οἱ πιστοί, ἵνα λάβωμεν ἅπαντες χάριν καὶ ἔλεος Ὅσιε Δανιήλ, Ὀρθοδόξων μέγα καύχημα.

Δόξα. Ἦχος πλ. β΄.

Τῶν Ὀρθοδόξων τὰ πλήθη συνέῤῥευσαν ἐν βράχῳ τῷ ὑψηλῷ τοῦ Μετεώρου, Ὅσιε, ᾄδοντές σοι ὕμνοις, ὡς καὶ ὠδὰς πνευματικάς, καὶ χεῖρας ἱκέτιδας ὑψοῦσι καὶ θερμῶς ἀεὶ παρακαλοῦσί σε τὸ μέγα τῆς ἀρετῆς θαυμαστὸν σκεῦος καὶ τῆς χάριτος κάτοπτρον τό ἅγιον καὶ τῆς τοῦ Χριστοῦ Ἐκκλησίας τὸ κλῆμα τὸ εὔκαρπον, Δανιήλ, δῶ ἅπασιν εἰρήνην καὶ πίστην θερμήν, ὡς καὶ ὑγιείαν, θεόφρον μακάριε.

Καὶ νῦν. Θεοτοκίον.

Δέσποινα πρόσδεξαι...

Ἀπόστιχα. Ἦχος β΄. Οἶκος τοῦ Ἐφραθᾶ.

Σκέπασον Δανιήλ, μονὰς τῶν Μετεώρων, καὶ τοῖς ἐνασκουμένοις, ἐν ταύταις σὺ χορήγει, τὰ τέλη ἀνεπαίσχυντα.

Στ. Τίμιος ἐναντίον Κυρίου...

Δίδου μοι Δανιήλ, χαρὰν τὴν οὐρανίαν, καὶ φύλαττε ἀπαύστως, τοὺς Ὀρθοδόξους Πάτερ, ἐκ πλάνης πολεμήτορος.

Στ. Οἱ Ἱερεῖς Σου Κύριε...

Κάρα σου ἡ σεπτή, τῇ θείᾳ χορηγίᾳ, ἰάματα παρέχει, τοῖς ταύτῃ προσιοῦσι, θεόφρον μετὰ πίστεως.

Δόξα. Τριαδικόν.

Χαῖρε Τριὰς σεπτή, Χριστιανῶν ἡ δόξα, καὶ καύχημα ἁπάντων, τῇ νεολαίᾳν πάσῃ, χορήγει Σὺ τὰ κρείττονα.

Καὶ νῦν. Θεοτοκίον.

Μῆτερ τοῦ Λυτρωτοῦ, Πανάχραντε Μαρία, ἡ δόξα τῶν Ἀγγέλων, καὶ Ὀρθοδόξων κλέος, παράσχου μοι μετάνοιαν.

Ἀπολυτίκιον. Ἦχος α΄. Τῆς ἐρήμου πολίτης.

Τσιοτίου τὸν γόνον καὶ Τρικκαίων τὸ καύχημα, μονῆς Μετεώρου τὸ κλέος, καὶ Ἑλλάδος τὸ σέμνωμα, Δανιὴλ εὐφημήσωμεν πιστοί, τὸν μέγαν τοῦ Σωτῆρος ἀθλητήν, τὸν παρέχοντα ἰάσεις παντοδαπάς, τοῖς πίστει ἀνακράζουσι· Δόξα τῷ σὲ δοξάσαντι Χριστῷ, δόξα τῷ σὲ θαυμαστώσαντι, δόξα τῷ δωρήσαντι ἡμῖν, τὴν πάντιμον κάραν σου.

Δόξα. Καὶ νῦν. Τῆς ἑορτῆς.

Ἐν τῇ Γεννήσει...

ΜΕΓΑΣ ΕΣΠΕΡΙΝΟΣ

Μετὰ τὸν Προοιμιακόν τὸ Μακάριος ἀνήρ· εἰς δὲ τὸ Κύριε ἐκέκραξα ἱστῶμεν στίχους στ΄ καί ψάλλομεν Στιχηρά Προσόμοια. Ἦχος δ΄. Ὡς γενναῖον ἐν Μάρτυσι.

Τσιοτίου ἐκβλάστημα, καὶ σεμνὸν ἐγκαλλώπισμα, Μετεώρων μέγιστον ὥσπερ καύχημα, καὶ μοναστῶν σὺ τὸ πρότυπον, καὶ ἅγιον κλέϊσμα, τῶν χαρίτων ἡ πηγή, καὶ κρουνὸς τῶν ἰάσεων, πανσεβάσμιε. Διὰ τοῦτο πιστοὶ σὲ ἀνυμνοῦσι, Δανιὴλ πνευματοφόρε, καὶ σοὶ προστρέχουσι πάντιμε.

Τῆς Ἑλλάδος τὸ καύχημα, καὶ πιστῶν καταφύγιον, Μετεώρων ὄντως σὺ τὸ θησαύρισμα, καὶ Τσιοτίου τὸ γέννημα, καὶ ἔκθρεμμα ἅγιον, Ὀρθοδόξων χαρμονή, καὶ πηγὴ πάσης χάριτος, τρισμακάριστε. Διὰ τοῦτο πληθὺς τῶν Ὀρθοδόξων, Δανιὴλ χαρισματοῦχε, σοὶ καταφεύγουσι Ὅσιε.

Τὸν Χριστὸν σὺ ἠγάπησας, καὶ Αὐτῷ ἠκολούθησας, καὶ δοχεῖον γέγονας θείου Πνεύματος, καὶ ἀρετῶν ἐνδιαίτημα, ἀγάπη κοσμούμενος, καὶ φρονήσει σοφῇ καὶ πλουσίᾳ, χρηστότητι καὶ πραότητι. Διὰ τοῦτο χοροὶ τῶν μοναζόντων, Δανιὴλ ἀκαταπαύστως, ᾤδὰς καὶ ὕμνους σοι μέλπωσι.

Ἐγκρατείᾳ ἐνέκρωσας, τῆς σαρκὸς τὴν εὐπάθειαν, καταπλήξας ἅπαντας τῇ ἀσκήσει σου, τὴν δὲ ψυχὴν ἀπετέλεσας, δοχεῖον ὑπέρτιμον, ἀποῤῥοίας θεϊκῆς, καὶ ἀΰλου ἐλλάμψεως μάκαρ Ὅσιε, τῆς Ἁγίας Τριάδος, ᾗ παρέστης, στεφηφόρος θεοφόρε, θείαν καρπούμενος μέθεξιν.

Ἀσθενῶν ἰατήριον, καὶ χηρῶν σὺ τὸ στήριγμα, ὀρφανῶν προστάτης καὶ καταφύγιον, ἀδικουμένων ὁ πρόμαχος, καὶ τεῖχος ἀπόρθητον, τῶν θαυμάτων ἡ πηγή, καὶ δαιμόνων καθαίρεσις, Πάτερ Ἅγιε. Διὸ πάντες σοφέ σε ἀνυμνοῦσι, Δανιήλ, ἡμῶν ἡ δόξα, καὶ μακαρίζουσιν πάντιμε.

Ὡς τοῦ κόσμου τὴν εὔκλειαν, καὶ φθαρτὴν περηφάνειαν, νουνεχῶς κατέλιπες θείῳ ἔρωτι, τὸν σὸν σταυρὸν ἧρας Ὅσιε, καὶ χαίρων τοῖς ἴχνεσιν, ἠκολουθήσας Χριστοῦ, σεαυτὸν ἀρνησάμενος, τρισμακάριστε· καὶ λαμπρύνας τὸν νοῦν πράξεσι θείαις, μοναστῶν σε ὑφηγῆτορ, περιφανὴς ἐχρημάτισας.

Δόξα. Ἦχος β΄.

Τὸν τῆς Ἐκκλησίας μέγαν κήρυκα ἅπαντες, ἐν ὕμνοις τιμήσωμεν προφρόνως, τόν τοῦ Πνεύματος δοχεῖον καὶ ταμεῖον, καὶ τῶν Μετεώρων καρπὸν τὸν εὔχημον, καὶ Τσιοτίου φύλακα καὶ φρουρὸν ἀκοίμητον. Διὸ σεμνοπρεπῶς πιστοί, πίστει καὶ πόθῳ προστρέχουσι, πρός σε θαυματουργέ.

Καὶ νῦν. Τῆς ἑορτῆς.

Δεῦτε τὴν παγκόσμιον Κοίμησιν...

Εἴσοδος, Φῶς ἱλαρόν, τὸ Προκείμενον τῆς ἡμέρας καὶ τὰ Ἀναγνώσματα.

Σοφίας Σολομῶντος τὸ Ἀνάγνωσμα (γ´ 1-9).

Δικαίων ψυχαὶ ἐν χειρὶ Θεοῦ, καὶ οὐ μὴ ἅψηται αὐτῶν βάσανος. Ἔδοξαν ἐν ὀφθαλμοῖς ἀφρόνων τεθνάναι, καὶ ἐλογίσθη κάκωσις ἡ ἔξοδος αὐτῶν, καὶ ἡ ἀφ᾿ ἡμῶν πορεία σύντριμμα· οἱ δέ εἰσιν ἐν εἰρήνῃ. Καὶ γὰρ ἐν ὄψει ἀνθρώπων ἐὰν κολασθῶσιν, ἡ ἐλπὶς αὐτῶν ἀθανασίας πλήρης. Καὶ ὀλίγα παιδευθέντες, μεγάλα εὐεργετηθήσονται· ὅτι ὁ Θεὸς ἐπείρασεν αὐτούς, καὶ εὗρεν αὐτοὺς ἀξίους ἑαυτοῦ. Ὡς χρυσὸν ἐν χωνευτηρίῳ ἐδοκίμασεν αὐτούς, καὶ ὡς ὁλοκάρπωμα θυσίας προσεδέξατο αὐτούς. Καὶ ἐν καιρῷ ἐπισκοπῆς αὐτῶν ἀναλάμψουσι, καὶ ὡς σπινθῆρες ἐν καλάμῃ διαδραμοῦνται. Κρινοῦσιν ἔθνη, καὶ κρατήσουσι λαῶν, καὶ βασιλεύσει αὐτῶν Κύριος εἰς τοὺς αἰῶνας. Οἱ πεποιθότες ἐπ᾿ αὐτόν, συνήσουσιν ἀλήθειαν, καὶ οἱ πιστοὶ ἐν ἀγάπῃ προσμενοῦσιν αὐτῷ· ὅτι χάρις καὶ ἔλεος ἐν τοῖς ὁσίοις αὐτοῦ, καὶ ἐπισκοπὴ ἐν τοῖς ἐκλεκτοῖς αὐτοῦ.

Σοφίας Σολομῶντος τὸ Ἀνάγνωσμα (ε´ 15-23, στ´ 1-3).

Δίκαιοι εἰς τὸν αἰῶνα ζῶσι, καὶ ἐν Κυρίῳ ὁ μισθὸς αὐτῶν, καὶ ἡ φροντὶς αὐτῶν παρὰ Ὑψίστῳ. Διὰ τοῦτο λήψονται τὸ βασίλειον τῆς εὐπρεπείας, καὶ τὸ διάδημα τοῦ κάλλους ἐκ χειρὸς Κυρίου· ὅτι τῇ δεξιᾷ αὑτοῦ σκεπάσει αὐτούς, καὶ τῷ βραχίονι ὑπερασπιεῖ αὐτῶν. Λήψεται πανοπλίαν τὸν ζῆλον αὐτοῦ καὶ ὁπλοποιήσει τὴν κτίσιν εἰς ἄμυναν ἐχθρῶν. Ἐνδύσεται θώρακα δικαιοσύνην καὶ περιθήσεται κόρυθα κρίσιν ἀνυπόκριτον. Λήψεται ἀσπίδα ἀκαταμάχητον, ὁσιότητα· ὀξυνεῖ δὲ ἀπότομον ὀργὴν εἰς ῥομφαίαν. Συνεκπολεμήσει αὐτῷ ὁ κόσμος ἐπὶ τοὺς παράφρονας· πορεύσονται εὔστοχοι βολίδες ἀστραπῶν, καὶ ὡς ἀπὸ εὐκύκλου τόξου, τῶν νεφῶν, ἐπὶ σκοπὸν ἁλοῦνται, καὶ ἐκ πετροβόλου θυμοῦ πλήρεις ῥιφήσονται χάλαζαι. Ἀγανακτήσει κατ᾿ αὐτῶν ὕδωρ θαλάσσης· ποταμοὶ δὲ συγκλύσουσιν ἀποτόμως. Ἀντιστήσεται αὐτοῖς πνεῦμα δυνάμεως, καὶ ὡς λαῖλαψ ἐκλικμήσει αὐτούς, καὶ ἐρημώσει πᾶσαν τὴν γῆν ἀνομία, καὶ ἡ κακοπραγία περιτρέψει θρόνους δυναστῶν. Ἀκούσατε οὖν, Βασιλεῖς, καὶ σύνετε· μάθετε Δικασταὶ περάτων γῆς· ἐνωτίσασθε οἱ κρατοῦντες πλήθους, καὶ γεγαυρωμένοι ἐπὶ ὄχλοις ἐθνῶν· ὅτι ἐδόθη παρὰ Κυρίου ἡ κράτησις ὑμῖν, καὶ ἡ δυναστεία παρὰ Ὑψίστου.

Σοφίας Σολομῶντος τὸ Ἀνάγνωσμα (δ´ 7-15).

Δίκαιος, ἐὰν φθάσῃ τελευτῆσαι, ἐν ἀναπαύσει ἔσται. Γῆρας γὰρ τίμιον, οὐ τὸ πολυχρόνιον, οὐδὲ ἀριθμῷ ἐτῶν μεμέτρηται. Πολιὰ δέ ἐστι φρόνησις ἀνθρώποις· καὶ ἡλικία γήρως, βίος ἀκηλίδωτος. Εὐάρεστος Θεῷ γενόμενος, ἠγαπήθη, καὶ ζῶν μεταξὺ ἁμαρτωλῶν, μετετέθη. Ἡρπάγη, μὴ κακία ἀλλάξῃ σύνεσιν αὐτοῦ, ἢ δόλος ἀπατήσῃ ψυχὴν αὐτοῦ. Βασκανία γὰρ φαυλότητος ἀμαυροῖ τὰ καλά, καὶ ῥεμβασμὸς ἐπιθυμίας μεταλλεύει νοῦν ἄκακον. Τελειωθεὶς ἐν ὀλίγῳ, ἐπλήρωσε χρόνους μακρούς· ἀρεστὴ γὰρ ἦν Κυρίῳ ἡ ψυχὴ αὐτοῦ· διὰ τοῦτο ἔσπευσεν ἐκ μέσου πονηρίας. Οἱ δὲ λαοὶ ἰδόντες, καὶ μὴ νοήσαντες, μηδὲ θέντες ἐπὶ διανοίᾳ τὸ τοιοῦτον, ὅτι χάρις καὶ ἔλεος ἐν τοῖς ὁσίοις αὐτοῦ, καὶ ἐπισκοπὴ ἐν τοῖς ἐκλεκτοῖς αὐτοῦ.

Εἰς τὴν Λιτὴν τὰ Ἰδιόμελα. Ἦχος α´.

Ἀνέτειλεν ἡμῖν σήμερον, ἐν τῷ τῆς Ἐκκλησίας νοητῷ στερεώματι, ὁ ἐκ Τσιοτίου ἀστὴρ ὁ λαμπρότατος, Δανιὴλ ὁ θεσπέσιος. Δεῦτε οὖν Ὀρθόδοξοι, τὴν ἐτήσιον αὐτοῦ μνήμην ὠδαῖς ἀνυμνήσωμεν, ὡς ἰατροῦ τῶν σωμάτων, καὶ πρεσβευτοῦ ἡμῶν θερμοτάτου πρὸς Κύριον.

Ἦχος β΄.

Ἡ ἀπείροδωρος χάρις τοῦ Πνεύματος, ἐν τῇ σῇ κάρα ἐνοικοῦσα, ὀσμῆς θείας ταύτην ἔπλησε, καὶ δύναμιν παρέσχεν, ἐνεργεῖν τὰς ἰάσεις. Χριστὸς γὰρ Ὅν ἠγάπησας, ἐξ’ ὅλης καρδίας, θαυμαστῶς σὲ ἐδόξασεν, ἐν τοῖς ἐσχάτοις χρόνοις, Δανιὴλ Πάτερ Ὅσιε· ᾧ πρέσβευε δεόμεθα, ῥύεσθαι ἡμᾶς πάσης θλίψεως, καὶ σωθῆναι τὰς ψυχὰς ἡμῶν.

Ἦχος γ΄.

Ἐν τῷ βράχῳ τοῦ Μετεώρου κατῴκησας, Ἅγιε νεκρὸς τῷ κόσμῳ γενόμενος, καὶ ἐν Χριστῷ ζῶν καὶ κινούμενος· καὶ ἐγκρατείᾳ πολλῇ ὑποπιάσας τὸ σῶμα, θεωριῶν θείων ἠξιώθης, καὶ ἀμαράντους θεόφρον στεφάνους ἔλαβες παρὰ Πατρός. Ὅθεν αἰδέσιμος ὤφθης πᾶσι, καὶ ἐχθροῖς φοβερός, ἐνεργείᾳ κρείττονι· καὶ νῦν ἐν τῷ Παραδείσῳ τρυφῶν τῆς μακαρίας δόξης, ὑπὲρ ἡμῶν Χριστὸν δυσώπει, Δανιὴλ Ὅσιε.

Δόξα. Ἦχος πλ. α΄.

ᾌσατε πιστοί, Δανιὴλ τὸν μακάριον ᾄσατε, καὶ δοξάσατε αὐτὸν Ὀρθοδόξων χοροί, καὶ μοναζόντων αἱ τάξεις τὴν ἱερὰν αὐτοῦ μνήμην, ὕμνοις καὶ ᾠδαῖς τιμήσατε· αὐτὸς γὰρ πρεσβεύει ἀδιαλείπτως, δωρηθῆναι τοῖς Ὀρθοδόξοις, εἰρήνη καὶ τὸ μέγα ἔλεος.

Καὶ νῦν. Τῆς ἑορτῆς.

ᾌσατε λαοί, τῇ Μητρὶ τοῦ Θεοῦ ἡμῶν ᾄσατε...

Εἰς τὸν Στίχον. Ἦχος πλ. α΄. Χαίροις ἀσκητικῶν.

Πύλας, τοῦ Παραδείσου σεμνέ, τῇ προσευχῇ καὶ τῇ ἀσκήσει ἠνέωξας, Ἀγγέλοις τε καὶ Ὁσίοις, ὡς καὶ Μαρτύρων σοφέ, ἀνεδείχθης Πάτερ ἱσοστάσιος, καὶ δόξης τῆς κρείττονος, κοινωνὸς καὶ συμμέτοχος, καὶ τῆς ἀλήκτου, εὐφροσύνης ὁ μέτοχος, μάκαρ ἔνδοξε, ἀληθῶς ἀναδέδειξαι. Ῥῦσαι οὖν πλάνης Ἅγιε, ἡμᾶς τοὺς προστρέχοντας, πίστει καὶ πόθῳ, θεόφρον, πρὸ τῆς ἁγίας Εἰκόνος σου· τὸν Κύριον ἔτι, Δανιὴλ σὺ ἐκδυσώπει, σωθῆναι ἅπαντας.

Στ. Τίμιος ἐναντίον Κυρίου...

Μάκαρ θαυματουργὲ Δανιήλ, τῶν Ὀρθοδόξων σὺ θεόφρον τὸ ἔρεισμα, Ἑλλάδος ἁπάσης δόξα, καὶ Τσιοτίου βλαστός, καὶ τῶν Μετεώρων ἄνθος εὔοσμον, ἡμῶν τὸ ὑπόδειγμα, μοναζόντων τὸ σέμνωμα, καὶ τῶν ἐν θλίψει, παραμύθιον ἄριστον, ὁδηγὸς ἔτι τῆς νεότητος γέγονας· ὅθεν τὴν θείαν κάραν σου, σεμνῶς λιτανεύουσι, τῶν Ὀρθοδόξων τὰ πλήθη, καὶ μετὰ πίστεως δέονται, Χριστὸν ἐκδυσώπει, ταῖς ψυχαῖς ἡμῶν δοθῆναι τὸ μέγα ἔλεος.

Στ. Οἱ Ἱερεῖς Σου Κύριε...

Χαίροις, ὁ Τσιοτίου βλαστός, καὶ Μετεώρων ὁ καρπὸς ὁ εὐφρόσυνος, ἁπάσης τῆς Θεσσαλίας, καὶ τῆς Ἑλλάδος σεμνέ, καὶ τῶν Ὀρθοδόξων καταφύγιον, δοχεῖον τοῦ Πνεύματος, ποταμὸς ὁ ἀείροος, ὡς καὶ ἀδάμας, καθαρώτατος Ἅγιε, καὶ πολύτιμος, ἀνεδείχθης τρισόλβιε. Σκέπε καὶ φρούρει Ὅσιε, τοὺς σὲ καταφεύγοντας, καὶ προσκυνοῦντας ἐν πόθῳ, τὴν χαριτόβρυτον κάραν σου, Χριστόν σύ δυσώπει, Δανιὴλ πνευματοφόρε, σωθῆναι ἅπαντας.

Δόξα. Ἦχος πλ. δ΄.

Χριστὸν ἐπόθησας ἀληθῶς, ἐξ ἀγκαλῶν, σοφέ, καὶ Αὐτῷ παρεδόθης, τὴν γονικὴν ἀγάπην ἀνεπιστρόφως καταλιπών, καὶ ἐν ὑψηλῷ βράχῳ ἀνελθῶν στεῤῥῶς ἐπεδόθης εἰς ἄσκησιν, παρθενίαν καὶ νηστείαν καὶ προσευχὴν ἠγαπήσας, καὶ ἰατρὸς ἀνεδείχθης ἀλάνθαστος τοῦ καρκίνου, ὡς καὶ τῶν ὀρφανῶν θερμῶν καταφύγιον. Διό σου, Ὅσιε Δανιήλ, ἐν κατανύξει δεόμεθα, εἰρήνην, πίστιν καὶ ῥώμην, παράσχου ἡμῖν Ἅγιε.

Καὶ νῦν. Τῆς ἑορτῆς.

Παρθενικαὶ χορεῖαι σήμερον...

Νῦν ἀπολύεις, Τρισάγιον, Ἀπολυτίκιον. Ἦχος α΄. Τῆς ἐρήμου πολίτης.

Τσιοτίου τὸν γόνον καὶ Τρικκαίων τὸ καύχημα, μονῆς Μετεώρου τὸ κλέος, καὶ Ἑλλάδος τὸ σέμνωμα, Δανιὴλ εὐφημήσωμεν πιστοί, τὸν μέγαν τοῦ Σωτῆρος ἀθλητήν, τὸν παρέχοντα ἰάσεις παντοδαπάς, τοῖς πίστει ἀνακράζουσι· Δόξα τῷ σὲ δοξάσαντι Χριστῷ, δόξα τῷ σὲ θαυμαστώσαντι, δόξα τῷ δωρήσαντι ἡμῖν, τὴν πάντιμον κάραν σου.

Δόξα. Καὶ νῦν. Τῆς ἑορτῆς.

Ἐν τῇ Γεννήσει...

ΟΡΘΡΟΣ

Μετὰ τὴν α΄ Στιχολογίαν, Κάθισμα. ἦχος δ΄. Κατεπλάγη Ἰωσήφ.

Ἀνεδείχθης ἀληθῶς, τῆς Ἐκκλησίας ἀετός, μοναστῶν ἡ καλλονή, καὶ ἰαμάτων ἡ πηγή, τῶν Ὀρθοδόξων τὸ σέμνωμα, θεοφόρε· ὅθεν ἱερῶς κόσμῳ διέπρεψας, γνώσει ἀληθεῖ καὶ λόγῳ κρείττονι, σοφὲ καὶ εὐσεβείας, Ἅγιε θεράπων Δανιήλ, ἀνεδείχθης τρισμέγιστος, καὶ νῦν δυσώπει πᾶσι, δοθῆναι πταισμάτων Πάτερ, συγχώρησιν.

Δόξα. Καὶ νῦν. Τῆς ἑορτῆς.

Καθορῶσαι ἀληθῶς...

Μετὰ τὴν β΄ Στιχολογίαν, Κάθισμα ὅμοιον.

Ἐν τῷ βράχῳ ἀνελθῶν τοῦ Μετεώρου ἀγαθέ, τὴν νηστείαν ἐνδυθεὶς ὡς πανοπλίαν ἰσχυράν, τὰ τῶν δαιμόνων κατέβαλες μάκαρ στίφη· διὸ θαυματουργέ, τῶν μοναζόντων χοροί, ἀγάλλονται ἀεὶ καὶ σὲ τιμῶσι σοφέ, καὶ διὰ τοῦτο χαίρουσι μητέρες καὶ θυγατέρες καὶ νύμφαι Χριστοῦ βοῶσαι· Χαῖρε τῶν Ὀρθοδόξων δόξα καὶ κλέος πάντιμε.

Δόξα. Καὶ νῦν. Τῆς ἑορτῆς.

Μετὰ τὸν Πολυέλεον, Κάθισμα. Ἦχος πλ. δ΄. Τὴν Σοφίαν καὶ Λόγον.

Τὸν Χριστὸν ἠκολούθησας, ἀκλινῶς ἐν τῷ βίῳ σου, μάκαρ θαυματουργέ, καὶ ἔλαμψας ἅπασι, Δανιὴλ τρισμακάριστε, καὶ χηρῶν παραμύθιον, καὶ πρόμαχος γέγονας, καὶ ὀρφανῶν βοηθός τε καὶ φύλαξ ἀκοίμητος· ὅθεν ἐπαξίως ἀγαθὲ ἀνεδείχθης, Πατέρων ἱσότιμος καὶ Ἁγίων συνόμιλος· διὰ τοῦτο βοῶμέν σοι· πρέσβευε Χριστῷ τῷ Θεῷ, τῶν πταισμάτων ἄφεσιν δωρήσασθαι, τοῖς ἑορτάζουσι πόθῳ τὴν ἁγίαν μνήμην σου.

Δόξα. Καὶ νῦν. Τῆς ἑορτῆς.

Ἡ Θεὸν συλλαβοῦσα...

Οἱ Ἀναβαθμοί. Τὸ α΄ ἀντίφωνον τοῦ δ΄ ἦχου.

Προκείμενον. Τίμιος ἐναντίον Κυρίου...

Στ. Μακάριος ἀνήρ...

Εὐαγγέλιον Ὁσιακόν. Πάντα μοι παρεδόθη... (ζήτει ἐν τῷ Ὄρθρῳ τοῦ Μ. Ἀντωνίου).

Ὁ Ν΄ Ψαλμός.

Δόξα. Ταῖς τοῦ Σοῦ Ὁσίου...

Καὶ νῦν. Ταῖς τῆς Θεοτόκου...

Ἰδιόμελον. Ἦχος πλ. β΄. Στ. Ἐλεῆμον, ἐλέησόν με ὁ Θεός...

Ἀπὸ παιδὸς τοῦ Χριστοῦ θαυματουργέ, τὰ ἴχνη ἠκολούθησας ἀσμένως καὶ ἐν τῷ βράχῳ ἀνῆλθες ποδὶ ἀγαλλομένῳ, σχῆμα ποθῶν τὸ ἀγγελικὸν καὶ βιοτὴν Ἁγίων, ἅ δ’ ἀγώνων ὑψηλῶν ἀπέλαβες Πάτερ Δανιὴλ θεόφρον. Ὅθεν πάντες ἡμεῖς ἐν ταπεινώσει καὶ πίστει σὲ ἱκετεύομεν, πρέσβευε ὑπὲρ ἡμῶν.

Εἶτα οἱ Κανόνες· τῆς Θεοτόκου καί τοῦ Ὁσίου.

ᾨδὴ α΄. Ἀνοίξω τὸ στόμα μου.

Χριστὸν καθικέτευε, Δανιὴλ Ὅσιε πάντιμε, καὶ φύλαττε ἅπαντας τοὺς σὲ γεραίροντας, ἐκ παθῶν τε καὶ κινδύνων, θεοφόρε, καὶ ἐκ τῶν παγίδων τοῦ ὄφεως εὔσπλαγχνε.

Τὸν Κτίστην τοῦ σύμπαντος, Δανιὴλ τάχος ἱκέτευε ὑπὲρ τῶν τιμώντων σε, καὶ ἀνυμνούντων σε, καὶ παράσχου μοι μετάνοια, θεόφρον, καὶ ζῆλον τὸν ἔνθεον, Πάτερ μακάριε.

Διέλυσας Ὅσιε Δανιήλ, Τρίκκης τὸ καύχημα, παγίδας τοῦ δράκοντος, καὶ κατεπόντισας, τῇ ἀσκήσει σου τὰ στίφη τῶν δαιμόνων· διὸ μακαρίζομέν σε πάντες Ἅγιε.

Θεοτοκίον.

Παρθένε Θεόνυμφε, Σὲ μακαρίζομεν ἅπαντες, καὶ τάχος προσπίπτωμεν καὶ ἀνακράζομεν· καθικέτευε, τὸν Κύριον τοῦ κόσμου, καὶ σῶσον τοὺς δούλους Σου, Νύμφη Ἀνύμφευτε.

ᾨδὴ γ΄. Τούς Σούς ὑμνολόγους.

Τοῖς σοῖς ὑμνολόγοις θεοφόρε, παράσχου βοήθειαν τὴν σήν, καὶ σῶσον Δανιὴλ σοφέ, ἐκ πάσης βλάβης Ὅσιε, καὶ τοὺς ἐν θλίψει Ἅγιε, σὺ παραμύθησον τάχιον.

Τὸν Πλάστην ἠγάπησας τρισμάκαρ, διὸ καὶ ἀνῆλθες θαυμαστέ, ἐν Μετεώροις ἔνδοξε, καὶ ἀνεδείχθης Ὅσιε, τῶν Ὀρθοδόξων καύχημα, καὶ μοναζόντων τὸ σέμνωμα.

Τούς σοί καταφεύγοντας τρισμάκαρ, βοήθει ἀπαύστως Δανιήλ, καὶ χάριζε πανάριστε, τὴν σκέπην σου πανθαύμαστε, ὡς καὶ τὰ τέλη Ὅσιε, ἡμῶν ἁπάντων ἀνώδυνα.

Θεοτοκίον.

Δίδου ὑγιείαν Θεοτόκε, τοῖς Σοί καταφεύγουσι θερμῶς, καὶ χάριζε Παντάνασσα, τοῖς Ὀρθοδόξοις ἅπασι, φόβον Θεοῦ καὶ δάκρυα, ὡς καὶ ταπείνωσιν Δέσποινα.

Κάθισμα. Ἦχος πλ. α΄. Τὸν συνάναρχον Λόγον.

Τοὺς ἀγώνας σου Πάτερ, καὶ κατορθώματα τῶν Ὀρθοδόξων τὰ πλήθη τιμῶσιν σήμερον καὶ Ἀγγέλων οἱ χοροὶ τούτους ἐθαύμασαν καὶ τῶν Ὁσίων ἡ πληθὺς κατεπλάγη ἀγαθέ, διό σοι βοῶμεν πάντες· Μάκαρ, Ὅσιε Δανιήλ, ῥῦσαι ἐκ κινδύνων χαλεπῶν ἅπαντας.

Δόξα. Καὶ νῦν. Τῆς ἑορτῆς.

Τῶν Ἀγγέλων τὰ πλήθη...

Ὠδὴ δ΄. Ὁ καθήμενος ἐν δόξῃ.

Τῶν δαιμόνων τὰ στίφη κατετρόπωσας Ὅσιε, ἐν τοῖς Μετεώροις μάκαρ Δανιὴλ τρισμακάριστε, τῇ τοῦ Θεοῦ βοήθειᾳ τοῖς προστρέχουσι πιστῶς Ἅγιε, πᾶσι παρέχεις ἰάματα.

Ῥώμη θεία θεοφόρε, ἱερῶς κυβερνώμενος ἐν τοῖς Μετεώροις χαίρων παραγένου, μακάριε, ἔνθα ὁσίως ἠρίστευσας παλαίσματι καὶ κατέβαλες τὸν πολυμήχανον δράκοντα.

Ἀνενδότῳ διανοίᾳ καὶ τελείῳ φρονήματι ἐκζητῶν, θεόφρον, τοῦ Χριστοῦ τὴν δόξαν τὴν ἄῤῥητον, ἐκ Τσιοτίου ἀπῆλθες καὶ ἐν τῷ βράχῳ κατεσκήνωσας διδασκαλίᾳ κοσμούμενος.

Θεοτοκίον.

Δανιὴλ ὁ τροπαιοῦχος, Σοὶ ἐβόα Πανύμνητε· χαῖρε πῖον ὄρος καὶ τετυρωμένον ἐν Πνεύματι· χαῖρε λυχνία καὶ στάμνε, μάνα φέρουσα, τὸ γλυκαῖνον, τὰ τῶν εὐσεβῶν αἰσθητήρια.

ᾨδὴ ε΄. Ἐξέστη τὰ σύμπαντα.

Ἐξέστησαν ἅπαντες ἐπὶ τῇ θείᾳ μνήμῃ σου, Πάτερ Δανιὴλ πνευματοφόρε, καὶ ἀνακράζουσι· τρισμακάριστε, παράσχου μετάνοιαν σοφέ, πᾶσι τοῖς ὑμνοῦσί σε, καὶ πιστῶς δεομένοις σου.

Ἐμέθυσας ἔρωτι, τοῦ Νυμφίου σου πάντιμε, σὺ γὰρ τὴν εὐσέβειαν κηρύξας, καὶ ἠγωνίσθης διὰ τὴν πίστιν σου, παράδειγμα μένων ἐν ἡμῖν, τῶν μακαριζόντων σε, Δανιὴλ τρισμακάριστε.

Ἰσχὺς καὶ ὀχύρωμα τῶν Ὀρθοδόξων Ὅσιε, Πάτερ Δανιὴλ σὺ ἀνεδείχθης, σὲ μακαρίζουσι μοναστῶν οἱ χοροὶ καὶ μέλπουσιν ᾄσματα ἀεὶ πάντες οἱ προσπίπτοντες πρὸ τῆς κάρας σου, πάντιμε.

Θεοτοκίον.

Λυχνία ἑπτάφωτος ἐδείχθης Πανακήρατε, Μῆτερ τοῦ Θεοῦ ἡγιασμένη· τὸν γὰρ Σωτῆρα καὶ τοῦ παντὸς ποιητὴν ἀσπόρως ἐκύησας Ἁγνή, καὶ ἔσωσας ἅπαντας ἡμᾶς ἐκ πλάνης Ἄχραντε.

Ὠδὴ στ΄. Τὴν θείαν ταύτην.

Νοσήσας ἐκ πάντων Ἅγιε, πρός σε νῦν καταφεύγων ὁ ἄθλιος καὶ ἀνακράζω σοι, μάκαρ, βοήθειαν δίδου μοι καὶ ῥῦσαί με ἐκ πλάνης ταχέως Ὅσιε.

Δεχθεὶς ἐπίθεσιν Ὅσιε, παρὰ τοῦ ἀρχεκάκου ἀλάστορος διὸ προστρέχω σοι, δός μοι βοήθειαν, Ἅγιε, καὶ τὸν Δεσπότην πάντων θερμῶς ἱκέτευε.

Ὁσίως μάκαρ, ἐβίωσας καὶ φῶς τοῖς Ὀρθοδόξοις σὺ γέγονας καὶ καταφύγιον τῶν ἐν πελάγει τῶν θλίψεων, καὶ τῶν τυραννουμένων ὑπὸ τοῦ δαίμονος.

Θεοτοκίον.

Χριστὸν καὶ Λόγον Ἀμόλυντε, Πανάχραντε καὶ πάγκαλε Δέσποινα, Σὺ καθικέτευε, καὶ δίδου Κόρη τοῖς δούλοις Σου, φῶς καὶ γαλήνην τάχος, Μαρία ἔνδοξε.

Κοντάκιον. Ἦχος δ΄. Ἐπεφάνης σήμερον.

Ὡς ἀστὴρ ἀνέτειλας ἐκ Τσιοτίου, καὶ πιστοὺς ἐδίδαξας διὰ τοῦ βίου σου σοφέ, ὑπομονὴν καὶ ἐγκράτειαν. Χαίροις θεόφρον, Δανιὴλ μακάριε.

Ὁ Οἶκος.

Ὁ χορὸς τῶν πιστῶν συναγάλλεται, Δανιὴλ τὴν μνήμην γεραίροντες. Μοναχοὶ Θετταλοί, πανέλληνες καὶ Ὀρθόδοξοι, πτωχοὶ καὶ αὐτόχθονες, ἐπὶ τῷ βράχῳ τῷ ὑψηλῷ πάντες δράμετε· ἡ σεπτὴ γὰρ αὐτοῦ κάρα νέμει ἰάσεις, καὶ πιστῶς οἱ λαοὶ ἀπαρύονται, καὶ Θεὸν ἀνυμνοῦσι τρανῶς βοῶντες· χαίροις θεόφρον, Δανιὴλ μακάριε.

Συναξάριον.

Τῇ ΙΣΤ΄ τοῦ αὐτοῦ μηνός (Αὐγούστου), μνήμη τοῦ Ὁσίου Πατρός ἡμῶν Δανιήλ, τοῦ ἐκ Τσιοτίου (Φαρκαδόνας Τρικάλων) καταγομένου καί ἐν τῇ Μονῇ τοῦ Μεγάλου Μετεώρου ἀσκήσαντος (16^ος αἰ.).

 Στίχοι·

Ἐκ Τσιοτίου ἀπῆλθες θεοφόρε,

Καὶ ἐν τῷ βράχῳ ἀνῆλθες θεηγόρε,

ἔνθα θεοφιλῶς ἠσκήθης ἀπαύστως,

διὸ σὺ ἔλαβες στεφάνους ἐσχάτως.

Αὐτοῦ ἁγίαις πρεσβείαις, Χριστὲ ὁ Θεὸς, ἐλέησον ἡμᾶς. Ἀμήν.

ᾨδὴ ζ΄. Οὐκ ἐλάτρευσαν.

Ἀνυμνοῦμέν σε οἱ δοῦλοί σου τρισόλβιε, καὶ ἀνακράζομεν· παράσχου θαυματουργέ, βοήθειαν ἅπασι τοῖς σοί προστρέχουσι καὶ χορήγει σύ τὰ τέλη ἀνεπαίσχυντα, καὶ χαρὰν τοῖς θλιβομένοις.

Ὑπερένδοξον καὶ καύχημα θεσπέσιε, σὲ ὀνομάζουσι τῶν Ὀρθοδόξων πληθύς, διὰ τούς ἀγῶνάς σου, οὕς σύ ὑπήνεγκας· διὸ ἄδουσι, ὁ τῶν Πατέρων Κύριος, καὶ Θεὸς εὐλογητὸς εἶ.

Ὁ περίδοξος καὶ φωτοφόρος βίος σου, διαβεβόηται εἰς πᾶσαν χώραν σοφέ· ἐντεῦθέν σοι ἔσπευδον, καὶ πάντες ψάλλουσι τρισμακάριστε· ὁ τῶν Πατέρων Κύριος, καὶ Θεὸς εὐλογητὸς εἶ.

Θεοτοκίον.

Μὴ παρίδης με τὸν ἄθλιον Πανάχραντε, Μαρία ἄσπιλε, τὸν προσφευγόντα ταῖς Σαῖς εὐχαῖς καὶ ἐν ᾄσμασι θείους ὑμνοῦντά Σε, Ἀειπάρθενε, φωτολαμπὲς παλάτιον τοῦ πάγκαλου Βασιλέως.

ᾨδὴ η΄. Παῖδας εὐαγεῖς.

Μάκαρ Δανιὴλ πνευματοφόρε, σὺ δίδως εἰρήνην πᾶσι τοῖς προστρέχουσι πίστει πρὸ τῆς κάρας σου, Ὅσιε τρισόλβιε, καὶ διὰ τοῦτο ᾄδωμεν ἀγαλλιώμενοι· τὸν Κύριον ὑμνεῖτε τὰ ἔργα καὶ ὑπερυψοῦτε εἰς πάντας τοὺς αἰῶνας.

Ῥῶσιν καὶ ὑγιείαν θεοφόρε, κομίζοντες οἱ προστρέχοντες τῇ σκέπῃ σου· βρύεις γὰρ ἰάματα, καὶ διώκεις πνεύματα, ἀκάθαρτα τῇ χάριτι τοῦ θείου Πνεύματος, ὡς μέγα τῶν πιστῶν ἀντιλήπτωρ, καὶ τῶν ἐν ἀνάγκαις, προστάτης θεηγόρε.

Ἅπασα ἡ Τρίκκη μακαρίζει, τὰ θεῖά σου θεοφόρε προτερήματα, καὶ πιστῶς προστρέχουσα, τῇ ἁγίᾳ κάρα σου, γεραίρει σά ἀθλήματα συμφώνως κράζουσα· τὸν Κύριον ὑμνεῖτε τὰ ἔργα καὶ ὑπερυψοῦτε εἰς πάντας τοὺς αἰῶνας.

Θεοτοκίον.

Πανάχραντε Κόρη Θεοτόκε, τὸν νοῦν μου καταύγασον Σεμνή, καὶ τοῦτον ἀποκάθαρον ἐκ τῶν παραπτώσεων, καὶ δίδου ἡμῖν δύναμιν, ὡς πάντες μέλψωμεν· τὸν Κύριον ὑμνεῖτε τὰ ἔργα καὶ ὑπερυψοῦτε εἰς πάντας τοὺς αἰῶνας.

ᾨδὴ θ΄. Ἅπας γηγενής.

Στῶμεν εὐλαβῶς ἐν οἴκῳ Θεοῦ ἡμῶν καὶ ἐκβοήσωμεν· χαῖρε Δανιὴλ σοφέ, τῶν Μετεώρων καύχημα ἔνδοξον, χαῖρε τοῦ Τσιοτίου ἐκβλάστημα ἅγιον, χαῖρε Ὀρθοδόξων νέον ἔρεισμα καὶ ἡμῶν τῶν πιστῶν καταφύγιον.

Μέγαν σε φρουρὸν καὶ ἄγρυπνον φύλακα πιστοί σε ἔχομεν· χαῖρε Δανιὴλ σοφέ, τῶν Ὀρθοδόξων καύχημα ἅγιον, χαῖρε τοῦ Μετεώρου ἄνθος τὸ πανεύοσμον, χαῖρε μάκαρ, τῆς Ἑλλάδος σέμνωμα, καὶ ἡμῶν τῶν πιστῶν καταφύγιον.

Σπεῦσον Δανιήλ, καὶ ἔκτεινον Ἅγιε, τὰς θείας χεῖράς σου, τοῖς πλέουσιν σύμπλευσον, καὶ τοῖς ὁδοιποροῦσι συνόδευσον, τοὺς δὲ νοσούντας ἴασαι τάχος, ἀνάργυρε, καὶ τὴν κώμην, τὴν ἐνεγκαμένην σε, πειρασμῶν καὶ κινδύνων διάσωζε.

Θεοτοκίον.

Δεῦτε ἀδελφοί, οἱ καταποντούμενοι ὑπὸ τῶν θλίψεων, καὶ ἐν μιᾷ τῇ φωνῇ, συναθροισθέντες ἀναβοήσωμεν· χαῖρε Μαρία ἔνδοξε, τῶν γυναικῶν χαρμονή, χαῖρε Παρθένε, θεῖον ἐγκαλλώπισμα, καὶ ἡμῶν σὺ καταφύγιον.

Ἐξαποστειλάριον. Ὁ οὐρανὸς τοῖς ἄστροις.

Τῶν πτωχῶν τὸν προστάτην, καὶ μοναζόντων τὴν δόξαν, ἀξιοχρέως ἐν ὕμνοις, τιμῶμεν ἀδιαλείπτως, καὶ ἱκετεύομεν πάντες, ῥῦσαι ἐκ πλάνης θεόφρον.

Θεοτοκίον.

Τῶν Ἀποστόλων ὁ δήμος...

Εἰς τοὺς Αἴνους ἱστῶμεν στίχους δ΄ και ψάλλομεν Στιχηρά Προσόμοια. Ἦχος α΄. Τῶν οὐρανίων ταγμάτων.

Τῆς τοῦ Χριστοῦ Ἐκκλησίας ἄνθος τὸ εὔοσμον, σὺ ἀληθῶς ἐδείχθης, καὶ Τρικκαίων τὸ κλέος, καὶ πάντων Ὀρθοδόξων ὁ ἀῤῥωγός, ὡς καὶ μέγα προπύργιον. Σκέπε καὶ φρούρει ἀπαύστως θαυματουργέ, τοὺς πιστῶς σοι καταφεύγοντας.

Τῶν Μετεώρων τὸ κλέος καὶ θεῖον καύχημα, σὺ Πάτερ ἀνεδείχθης, τῇ ἀσκήσει θεόφρον, καὶ πάντας ὑπερέβης θαυματουργέ, τοῖς ἀγῶσί σου Ἅγιε, διὸ Τριὰς σὲ ἀνέδειξεν ἀληθῶς, τοῦ Παραδείσου οἰκήτορα.

Σὺ Τσιοτίου ἐδειχθης ἄνθος μυρίπνοον, τῶν Μετεώρων δόξα, καὶ πανάγιον σκεῦος, τῆς πίστεως θεμέλιον ἀῤῥαγές, ἀρετῶν ἐνδιαίτημα, καὶ Ὀρθοδόξων ἁπάντων καταφυγή, Δανιὴλ ὡς καὶ ὑπόδειγμα.

Τῶν μοναζόντων τὸ ῥόδον καὶ μέγα πρότυπον, σὺ ἀληθῶς ἐφάνης, Δανιὴλ θεοφόρε, παρέχεις τὰς ἰάσεις θαυματουργέ, τοῖς ἐν πίστει προστρέχουσι, πρὸ τῆς Ἁγίας σου κάρας γονυκλεινῶς, Πάτερ Ὅσιε καὶ πάντιμε.

Δόξα. Ἦχος α΄.

Σὺν Ἀγγέλοις Ὀρθόδοξοι σήμερον, ἀγάλλωνται καὶ ἐν ὕμνοις τιμῶσιν εὐλαβῶς πάντες, Δανιὴλ τὸ πάγχρυσον στόμα καὶ λυχνίαν ἑπτάφωτον, τὸ δοχεῖον τοῦ Πνεύματος, καὶ ταμεῖον τῆς χάριτος, τὸ μέγαν ἐραστὴν τῆς νηστείας, καὶ δι’ ἀθλητικῶν πόνων εὐαρεστήσαντα τὸν Κύριον· αὐτοῦ δεόμεθα ἅπαντες, τὸν Κύριον ἀπαύστως, δυσώπει μάκαρ ὑπὲρ τῶν γεραιρόντων σε.

Καὶ νῦν. Τῆς ἑορτῆς.

Ἔπρεπε τοῖς αὐτόπταις τοῦ Λόγου...

Δοξολογία Μεγάλη καὶ Ἀπόλυσις.

Εἰς τὴν Λειτουργίαν.

Τὰ Τυπικά, οἱ Μακαρισμοί καὶ ἐκ τοῦ Κανόνος τοῦ Ὁίου ἡ γ΄ καὶ στ΄ ᾠδή.

Ἀπόστολος καὶ Εὐαγγέλιον Ὁσιακά.

Κοινωνικόν. Εἰς μνημόσυνον αἰώνιον.

Μεγαλυνάριον.

Χαίροις Ἐκκλησίας ὁ ἀριστεύς, χαίροις Τσιοτίου ὁ ἀκοίμητος ὀφθαλμός. Χαίροις Μετεώρων, ἀγλάϊσμα τὸ θεῖον. Ὦ! Δανιὴλ παμμάκαρ, πιστῶν τὸ στήριγμα.